Сайт писателя-сатирика Инсура Мусанифа

Инсур Мусанниф

Официальный сайт писателя-сатирика

Йокы даруы

Категория: 
Дата написания: 
06 декабря 2005

Инсур Мөсәнниф
Йокы даруы
Йокысызлыктан интегәсезме? Һи-и, тапккансыз борчылыр нәрсә. Хәзер мин сезгә бер дару өйрәтәм - моннан да гадирәге юк.

Аны әзерләү өчен 1 стакан юылган солы ашлыгы кирәк. (Сатып аласызмы, урлыйсызмы, анысы сезнең эш). Тик бер шарт бар. Шушы вакыттан алып бер генә минут та черем итәргә ярамый, югыйсә даруның файдасы ташка үлчим генә булачак.

Аңа (юылган солы ашлыгына) 1 литр җылы су коегыз, 20 сәгать шулай тотканнан соң ярты сәгать салмак утта пешерегез. Тик карагыз аны, йокламаска! Аннары тагын 32 сәгатькә төреп куегыз, сөзегез, кайнаган су өстәп, кайнатманың күләмен 1 литрга кадәр җиткерегез. Йокламаска, дидем бит! Аны ашарга 11 сәгать 13 минут кала ярты стакан эчәргә кирәк.

Күзегезне тырнап ачып, аны эчкәннән соң, күрегез дә торыгыз, өч көн булмаса да, сутка ярым суеп ташлаган, яисә үлгән кеше кебек йокларсыз. Биллаhи газим!

Кайда, кайчан басылган:
1) Мөсәнниф Инсур. Йокы даруы. Юмореска. "Яңавыл таңнары", 15.04.2006, №45.
2) Инсур Шәңгәрәев. Йокы даруы. "Яңавыл таңнары", 29.03.2014, №60-61.

Добавить комментарий